Բրիտանացի առամնաբույժ Շայամ Վալաբհը Daily Mail-ի հետ զրույցում ասել է, որ ողողաջրի օգտագործումն ատամները խոզանակով մաքրելուց անմիջապես հետո կարող է բարձրացնել կարիեսի առաջացման հավանականությունը։ Բանն այն է, որ այդ հիգիենիկ միջոցները ատամների մակերեսից լվանում են կոնցենտրացված ֆտորը, որը պարունակվում է ատամի մածուկում։
Ատամնաբույժը նշել է, որ շատ մածուկներ պարունակում են ֆտոր՝ քիմիական տարր, որը մտնում է ատամի էմալի եւ դենտինի բաղադրության մեջ՝ այն դարձնելով ամուր եւ կայուն ագրեսիվ միջավայրի հանդեպ։ Ֆտորի անբավարարությունը հանգեցնում է ատամների զգայականության մեծացման, կարիոզ պրոցեսների, ստոմատիտների, գինգիվիտների եւ պարոդոնտի այլ հիվանդությունների առաջացման։
Վալաբհի կարծիքով՝ ժամանակ է պետք, որպեսզի ֆտորն ամրանա ատամների մակերեսին։ Այդ պատճառով անցանկալի է սնունդ եւ ըմպելիքներ օգտագործել ատամները մաքրելուց հետո 30 րոպեի ընթացքում։ Սխալ է նաեւ ատամների մաքրումը բերանի խոռոչի ողողմամբ ավարտելը հատուկ հեղուկով։ Այդ ագրեսիվ հիգիենիկ միջոցները մաքրում են նախապես մածուկի միջոցով ատամների վրա հայտնված ֆտորը։ Դա ժամանակի ընթացքում կարող է հանգեցնել կարիեսի առաջացման։
Հետևեք NEWS.am Medicine-ին Facebook-ում և Twitter-ում